రోజు రోజుకు మహిళల్లో పెరుగుతున్న గుండె జబ్బులు, వెలుగులోకి సంచలన విషయలు.

గుండె రక్తనాళాల జబ్బులకు చాలా కారణా లున్నాయి. వీటిలో ముఖ్యమైనవి మధు మేహం, అధిక రక్తపోటు, ధూమపానం, కొవ్వు అసాధారణ స్థాయిలో ఉండటం వంటివి. శరీరంలో ఉండే రకరకాల కొవ్వులను లిపిడ్స్‌ అంటారు. కానీ ప్రధానమైన కొవ్వు రూపాల్లో ఒకటి కొలెస్ట్రాల్‌, రెండోది ట్రై గ్లిజరాయిడ్స్‌. అయితే ఈ కాలంలో గుండె జబ్బులు వయసు, జెండర్‌తో సంబంధం లేకుండా వస్తున్నాయి. గుండె జబ్బుల బారిన పడుతున్న మహిళల సంఖ్య కూడా పెరుగుతోంది. జాతీయ కుటుంబ ఆరోగ్య సర్వే ప్రకారం.. భారతదేశంలో 15- 49 సంవత్సరాల వయస్సు గల మహిళల్లో 18.69% మందిలో రోగనిర్ధారణ చేయని రక్తపోటు ప్రభావం ఉంది.

దీంతో పురుషులకే ఎక్కువగా ఇలాంటి సమస్యలు ఉంటాయనే అపోహలు తొలగిపోయాయి. అనేక ఇతర అంతర్జాతీయ అధ్యయనాలు కూడా ఇప్పుడు మహిళల్లో మరణానికి ప్రధాన కారణం గుండె జబ్బులని పేర్కొన్నాయి. మహిళల్లో గుండె జబ్బులు ఎందుకు గుర్తించడం లేదు.. సాధారణంగా భారతదేశంలోని మహిళలు కుటుంబం కోసం తమ సొంత అవసరాలను విస్మరిస్తారు. వారి ఆరోగ్యాన్ని నిర్లక్ష్యం చేస్తారు. ఉదాహరణకు ఒక స్త్రీకి తేలికపాటి ఛాతీ నొప్పి ఉంటే, ఆమె లక్షణాలను విస్మరిస్తుంది. వైద్యుడిని సందర్శించకుండా, ఇంటి పనులపై దృష్టి పెడుతుంది.

మన సమాజంలోని పితృస్వామ్య విధానం కూడా మహిళలు తమను తాము చూసుకోవడం కంటే ఇతరుల శ్రేయస్సుకు ప్రాధాన్యం ఇవ్వాలని ఆశిస్తోంది. దీని ఫలితంగా మహిళల్లో ఆలస్యంగా రోగనిర్ధారణ జరుగుతోంది. దేశంలోని మహిళల్లో గుండె జబ్బులు పెరగడానికి ప్రధాన కారణాలలో ఇది ఒకటి. పురుషులు, స్త్రీలలో గుండెపోటు లక్షణాలు భిన్నంగా ఉంటాయి. చాలా మంది స్త్రీలకు గతంలో ఒకటి లేదా రెండుసార్లు గుండెపోటు వచ్చినా తెలియదు. పురుషులలో, గుండెపోటు సాధారణంగా విపరీతమైన, ఆకస్మిక ఛాతీ నొప్పికి కారణమవుతుంది. శరీరం చల్లగా మారిపోయి చెమటలు పోస్తాయి. అయితే మహిళల్లో లక్షణాలు స్వల్పంగా ఉంటాయి.

స్త్రీలలో లక్షణాలు దవడ నొప్పి, అలసట, మెడ, వెన్ను నొప్పి, చెమటలు పట్టడం, గుండెల్లో మంట వంటివి ఉంటాయి. ఈ లక్షణాలు కనిపించిన స్త్రీలు తప్పకుండా ఆరోగ్య పరీక్షలు చేయించుకోవాలి. ఆరోగ్యాన్ని మెరుగు పరచుకోవడానికి అవసరమైన చర్యలు తీసుకోవాలి. మహిళలు గుండెపోటు రాకుండా ఎలాంటి జాగ్రత్తలు తీసుకోవాలి, మిమ్మల్ని మీరు ఎడ్యుకేట్ చేసుకోండి. ప్రమాద కారకాలపై అవగాహన పెంచుకోండి. ధూమపానం లేదా పొగాకు వాడకం మానేయండి. గుండె ఆరోగ్యాన్ని కాపాడుకోవడానికి, స్థూలకాయాన్ని అధిగమించడానికి ప్రతిరోజూ 30-45 నిమిషాలు యోగా, డ్యాన్స్, రన్నింగ్, వాకింగ్ వంటి శారీరక కార్యకలాపాలలో పాల్గొనండి.

జంక్ ఫుడ్, ఎరేటెడ్ డ్రింక్స్ మానేయండి. సమతుల ఆహారాన్ని తీసుకోండి. కాంప్లెక్స్‌ కార్బోహైడ్రేట్లు, చిక్కుళ్ళు, పండ్లు, కూరగాయలు, తక్కువ చక్కెర, ఉప్పు, కొవ్వుతో కూడిన ఆరోగ్యకరమైన ఆహారాలు గుండె ఆరోగ్యంపై సానుకూల ప్రభావాన్ని చూపుతాయి. గుండెపోటుతో జెండర్‌కి ఎటువంటి సంబంధం లేదని. పురుషులు, స్త్రీలను సమానంగా ప్రభావితం చేస్తుందని గమనించడం ముఖ్యం. ఆరోగ్యకరమైన జీవనశైలిని అవలంబించడం, క్రమం తప్పకుండా ఆరోగ్య పరీక్షలు చేయించుకోవడం వల్ల మంచి ఆరోగ్యాన్ని బహుమతి పొందవచ్చు.